ဘုရားသခင်သို့ ပေးစာ
မြေကြီးက လိုနေသည့် အရာမှာ မိုးရေသာလျှင် ဖြစ်သည်။ အနည်းဆုံး တစ်ပြိုက် နှစ်ပြိုက် ကျလိုက်လျှင် လုံလောက်ပြီ။ သူ့ယာတော အကြောင်းကို ကောင်းကောင်း သိသည့် လင်းချိုသည် ဘာမျှ မလုပ်။ အရှေ့မြောက်ဘက် မိုးကောင်းကင်ကိုသာ မျှော်ကြည့်နေသည်။
“ မိန်းမရေ၊ မိုးကတော့ တစ်မကြီး ရွာတော့မယ် ထင်တယ်ကွ ”
ညစာစားရန် ခူးခပ်ပြင်ဆင်နေသော သူ့မိန်းမက
“ ဟုတ်ပါ့တော်၊ ဘုရားမတာပေါ့ ”
သားကြီးများမှာ ယာတဲတွင် အလုပ် လုပ်နေကြပြီး သားငယ်များမှာ အိမ်အနီးတွင် ကစားနေကြသည်။
“ ကဲ လာကြဟေ့၊ ထမင်း စားမယ် ”
သူတို့ ထမင်း စားနေစဉ်တွင် လင်းချိုပြောသည့် အတိုင်း မိုးသီး မိုးပေါက်ကြီးများသည် တဖြုန်းဖြုန်း ကျလာကြသည်။ အရှေ့မြောက်ထောင့် ကောင်းကင်တွင်မူ တိမ်တောင် တိမ်လိပ်ကြီးများသည် တရွေ့ရွေ့ လာနေကြလေပြီ။ လေသည် လန်းဆန်း၍ ချိုမွှေးနေသည်။
အိမ်ရှင် ယောက်ျားသည် နွားခြံဆီသို့ ကိစ္စ တစ်ခု ရှိပုံမျိုးဖြင့် ထွက်သွားသည်။ သို့ရာတွင် ဘာမျှ ကိစ္စ မရှိပါ။ ကိုယ်ပေါ်သို့ မိုးသီး မိုးပေါက်တို့ ကျသည့် အရသာကို ခံရန် ဖြစ်ပါသည်။ ပြန်လာသည့် အခါတွင် သူက
“ မိုးပေါ်က ကျတာတွေက မိုးသီး မိုးပေါက်တွေ မဟုတ်ဘူးကွ၊ ရွှေမိုး ငွေမိုးတွေ၊ မိုးစက်ကြီးကြီးတွေက ဆယ်ပြားစေ့လောက် ရှိပြီး မိုးစက် သေးသေးတွေက ငါးပြားစေ့လောက် ရှိတယ် ”
သူသည် မိုးစက် ကန့်လန့်ကာကြီးထဲတွင် ပန်းတွေ တဝေဝေ ဖြစ်နေသော ပြောင်းခင်းကြီးကို ကြည်နူးစွာ လှမ်းကြည့်နေသည်။ ထိုစဉ် လေ ခပ်ပြင်းပြင်းကျလာပြီး လေပြင်းနှင့်အတူ ကြီးမားသော မိုးသီးကြီးများ ကျလာသည်။ ထိုမိုးသီးကြီးများကမှ တကယ့် ရွှေစ ငွေစနှင့် တူခြင်း ဖြစ်သည်။ ကလေးများသည် မိုးရေထဲတွင် ပြေးလွှားကာ မိုးသီးများကို ကောက်ကြသည်။
“ မိုးသီးတွေက သိပ်များရင် မကောင်းဘူးဟေ့၊ တော်ဖို့ ကောင်းပြီ ထင်တယ် ” ဟု ယောက်ျားက မိုးသီးများကို ကြည့်ရင်း အလန့်တကြား ပြောသည်။
သို့ရာတွင် မိုးသီးများသည် ရပ်မသွားပါ။ အိမ်ခေါင်မိုးပေါ်၊ သစ်ပင်များပေါ်၊ ယာတောပေါ်၊ တောင်ကြောပေါ်၊ တောင်ကြားပေါ်သို့ တစ်နာရီခန့်မျှ ဆက်တိုက် ကျနေကြသည်။ ယာတော တစ်ခုလုံးသည် ဆားတွေ ပက်ထားသည့်နှယ် ဖွေးနေတော့သည်။ သစ်ပင်ပေါ်တွင် သစ်ရွက်တွေ မရှိတော့။ ပြောင်းနှံတွေ ပျက်ကုန်ပြီ။ ပြောင်းပွင့်တွေ ကြွေကျကုန်ကြပြီ။ လင်းချိုသည် ဝမ်းနည်း၍ မဆုံး ဖြစ်နေသည်။ မိုးသီး မုန်တိုင်း စဲသွားသည့် အခါ၌ လင်းချိုသည် ယာတောလယ်တွင် ရပ်ရင်း သူ့သားများကို ပြောနေသည်။
“ ကျိုင်းကောင်အုပ် ကျတာကမှ သက်သာဦးမယ်ကွာ၊ မိုးသီး ကျလိုက်တာ ဘာမှ မကျန်တော့ဘူး၊ ဒီနှစ်တော့ တို့များ ပြောင်းလည်း ရမှာ မဟုတ်ဘူး၊ ပဲလည်း ရမှာ မဟုတ်တော့ဘူး ”
ထိုညသည် စိတ်မကောင်းစရာည ဖြစ်သည်။
“ တစ်နှစ်လုံး လုပ်လိုက်ရတာကွာ၊ ဘာမှ မရလိုက်ဘူး ”
“ ဘယ်သူမှ မကယ်နိုင်တော့ဘူး ထင်ပါရဲ့ ”
“ ဒီနှစ်တော့ ဝမ်းစာတောင် ရှိမှာ မဟုတ်တော့ဘူး ”
သို့ရာတွင် တောင်ကြားထဲရှိ တစ်လုံးတည်းသော အိမ်တွင် နေကြသူတို့၏ စိတ်ထဲ၌ကား မျှော်လင့်ချက် တစ်ခု ရှိနေသည်။ ယင်းမှာ ဘုရားသခင်၏ မှိုင်းမမှု ဖြစ်သည်။
“ ပျက်တော့ ပျက်တာပေါ့လေ၊ ဒါပေမယ့် ဒီလောက်လည်း စိတ်ဓာတ် မကျကြပါနှင့်၊ ငတ်သေတဲ့ မသာရယ်လို့ မရှိပါဘူး ”
“ အင်း၊ ငတ်သေတဲ့ မသာ မရှိဘူးလို့တော့ ပြောကြတာပဲလေ ”
ထိုနေ့ည တစ်ညလုံး လင်းချိုသည် မျှော်လင့်ချက် တစ်ခုကိုသာ တွေးမိ၏။ ယင်းမှာ ဘုရားသခင်၏ မှိုင်းမမှု ဖြစ်သည်။ ဘုရားသခင်သည် လူသတ္တဝါ အပေါင်းတို့၏ စိတ်ထဲတွင် ရှိသည့် ဆန္ဒကို သိမြင်တော်မူသည် မဟုတ်လော။
လင်းချိုသည် ယာတောတွင် နွားလို ရုန်းဖို့လောက်ကိုသာ သိသူ ဖြစ်၏။ မည်သို့ စာရေးရမည်ကို မသိ။ နောက်တစ်နေ့ မနက် လင်းသည်နှင့် လင်းချိုသည် စာတစ်စောင်ကို ကြိုးစား၍ ရေးနေသည်။ သူ့ကို ဘုရားသခင်က မှိုင်းမတော် မူမည်ဟုလည်း သူ ယုံကြည်၏။
ထိုစာမှာ အခြားစာ မဟုတ်ပါ။ ဘုရားသခင်ထံ ပေးစာ ဖြစ်ပါသည်။
တပည့်တော် လျှောက်ထားအပ်ပါသည် ဘုရား၊ ယခုနှစ်တွင် အရှင်ဘုရားမှ မကယ်လျှင် တပည့်တော်တို့ မိသားစု ငတ်ကြရတော့မည်သာ ဖြစ်ပါသည်။ တပည့်တော်၏ လယ်ယာတောမှာ မိုးသီးကြောင့် ပျက်သွားသဖြင့် နောက်ထပ်ပြန်စိုက်ရန်နှင့် ကောက်သစ် မပေါ်မီ စားသောက်ရန် အတွက် ငွေတစ်ရာလောက် လိုပါသည်။
သူသည် စာကို စာအိတ်ထဲတွင် ထည့်၊ စာအိတ်ပေါ်တွင် “ ဘုရားသခင်ထံ ပေးရန် ” ဟု ရေးပြီး စာထည့်ရန် မြို့သို့ လာခဲ့သည်။ စာတိုက်မှ တံဆိပ်ခေါင်း တစ်လုံး ဝယ်၍ ကပ်ပြီးနောက် စာကို စာတိုက်ပုံးထဲသို့ ထည့်ထားခဲ့သည်။
စာပို့သမားသည် ထိုစာကို တွေ့သည့် အခါတွင် ရယ်မောကာ စာတိုက်ဗိုလ်ကို သွားပြသည်။ သူ့တစ်သက်တွင် ဘုရားသခင်ထံ လိပ်စာ တပ်ထားသော စာတစ်စောင်ကို တစ်ခါမျှ မတွေ့ဖူးခဲ့။ သဘောကောင်းသည့် ခပ်ဝဝ စာတိုက်ဗိုလ်ကြီးသည်လည်း ထိုလိပ်စာကို မြင်သည့် အခါတွင် ခွက်ထိုးခွက်လန် ရယ်မိသည်။ ထို့နောက် ချက်ချင်း လေးနက်သွားကာ စာကို စားပွဲပေါ်တွင် တဖျတ်ဖျတ် ရိုက်ရင်း
“ သူ့ခမျာ သနားပါတယ်ကွာ၊ ဘုရား တရားကို တော်တော် ယုံကြည်ရှာတာပဲ၊ သူ့လို ယုံကြည်နိုင်တဲ့သူ ဖြစ်ရင် ဘယ်လောက် ကောင်းမလဲ မသိဘူး၊ သူ့လို ယုံကြည်ချင်လိုက်တာ၊ သူ့လို မျှော်လင့်ချက်မျိုး ရှိချင်လိုက်တာ၊ ကြည့်စမ်းပါဦး၊ ဘုရားသခင်ဆီကို အားကိုးတကြီး စာနှင့် ပေနှင့်တောင် ဆက်သွယ်တယ် ”
ဝေငှ၍ မဖြစ်သည့် စာတစ်စောင်ကို ဖတ်ရင်း ဘာသာတရား ကိုင်းရှိုင်းပုံကို ကြည့်၍ စိတ်ပျက် အားငယ်ခြင်း မဖြစ်စေရန် တစ်ခုခု ကူညီသင့်သည်ဟု စာတိုက်ဗိုလ်ကြီး သဘောရသည်။ စာတစ်စောင်တော့ ပြန်သင့်သည်ဟုလည်း သူ သဘောရသည်။ သို့ရာတွင် စာကို ဖွင့်၍ ဖတ်လိုက်သည့် အခါ၌ သူ့စာကို ပြန်လျှင် စိတ်စေတနာ ကောင်းရုံ၊ မင်ရှိရုံ၊ စာရွက် ရှိရုံဖြင့် မလုံလောက်ကြောင်းကို သူ သဘောပေါက်လာသည်။ သို့ရာတွင် သူ့ ဆုံးဖြတ်ချက်ကို မပြောင်းပါ။ စာတိုက်ဗိုလ်ကြီးသည် စာတိုက် အမှုထမ်းများထံမှ ငွေကောက်သည်။ သူကိုယ်တိုင်လည်း သူ့လစာ တစ်စိတ်တစ်ပိုင်းကို ထည့်သည်။ သူ့မိတ်ဆွေများကလည်း “အလှူဒါန” အဖြစ် တတ်နိုင်သလောက် ထည့်ဝင်ကြသည်။
သို့ရာတွင် တစ်ချီတည်းဖြင့် ငွေတစ်ရာ ရဖို့ မလွယ်ပါ။ ထို့ကြောင့် စာတိုက် ဗိုလ်ကြီးသည် တစ်ဝက်ကျော်ကျော် ရှိသည့် ငွေစက္ကူများကို စာအိတ်တစ်အိတ်တွင် ထည့်ပြီး လင်းချိုထံ ပို့လိုက်သည်။ စာအိတ်ထဲတွင် “ဘုရားသခင်” ဆိုသည့် စာလုံး တစ်လုံးကိုသာ ရေးထားသည့် စာရွက် တစ်ရွက်ကိုလည်း ထည့်ပေးလိုက်၏။
နောက်တစ်နေ့ တနင်္ဂနွေနေ့ မနက် စောစောတွင် လင်းချိုသည် သူကိုယ်တိုင် စာတိုက်သို့ ပေါက်လာကာ သူ့အတွက် စာရောက်ခြင်း ရှိ မရှိကို လာ၍ စုံစမ်းသည်။ စာပို့သမား ကိုယ်တိုင် ထိုစာကို လင်းချို လက်သို့ ပေးလိုက်၏။ စာတိုက် ဗိုလ်ကြီးမှာကား ကုသိုလ်ကောင်းမှု တစ်ခုကို ပြုလုပ်ရသဖြင့် ပီတိဖြစ်နေသူ တစ်ဦး အနေဖြင့် အတွင်းဘက်မှ နေ၍ လင်းချိုကို လှမ်းကြည့်နေသည်။
လင်းချိုသည် စာအိတ်ကို ဖွင့်၍ ငွေစက္ကူများကို မြင်သည့် အခါတွင် နည်းနည်းမျှ အံ့အားသင့်ဟန် မပြပါ။ ထိုအရာများကို ရလိမ့်မည်ဟု သူ ယုံကြည်ပြီးသား ဖြစ်ဟန် တူပါသည်။ သို့ရာတွင် ပိုက်ဆံကို ရေတွက်ပြီးသည့် အခါတွင် လင်းချိုသည် ဒေါပွ၍ မဆုံး ဖြစ်နေသည်။ ဘုရားသခင်သည် ငွေ အရေ မမှားနိုင်။ သူ တောင်းသည့် ငွေ အရေအတွက်ကိုလည်း ငြင်းဆန်ခြင်း ပြုမည် မဟုတ်။
လင်းချိုသည် စာတိုက် ပြတင်းဝနားသို့ ရောက်လာကာ စာရွက် တစ်ရွက်နှင့် မင်ကို တောင်းသည်။ ထို့နောက် စာတိုက် ကောင်တာတွင် ထိုင်ကာ သူ ရေးမည့် အကြောင်းအရာကို မျက်မှောင်ကြီး ကုတ်၍ စဉ်းစားရင်း စာ တစ်စောင်ကို ရေးနေသည်။ စာရေးပြီးသည့် အခါ အပေါက်ဝသို့ သွားကာ တံဆိပ်ခေါင်း တစ်လုံး ဝယ်၍ တံတွေးဖြင့် ကပ်ပြီးသော် လက်ဖြင့် တဒုန်းဒုန်း မြည်အောင် ထုသည်။
စာတိုက်ပုံးထဲသို့ စာ ရောက်သွားသည်နှင့် စာတိုက် ဗိုလ်ကြီးသည် စာတိုက်ပုံးထဲမှ စာကို ယူ၍ ဖတ်၏။
စာထဲတွင် အောက်ပါ အတိုင်း ပါရှိ၏။
“ အရှင်ဘုရား၊ တပည့်တော် လျှောက်ထား တောင်းဆိုသည့် ပိုက်ဆံတို့ အနက် ငွေ ၇၀ သာ တပည့်တော် လက်ထဲ ရောက်ပါသည်။ ကျန်ငွေများကို ဆက်လက် ပို့ပါ ဘုရား။ တပည့်တော် အတွက် များစွာ အသုံးလိုနေပါသည်။ သို့ရာတွင် ယခု တစ်ခေါက် ပို့လျှင် စာတိုက်မှ မပို့ပါနှင့် ဘုရား။ စာတိုက် အမှုထမ်းများသည် လူလိမ် လူကောက်များ ဖြစ်ပါသည် ဘုရား …… လင်းချို ” ဟူ၍ ဖြစ်သည်။
[မက္ကဆီကို စာရေးဆရာ Gregoria Lopezy ၏ A Letter to God ကို ပြန်ဆိုသည်။]
-မြသန်းတင့်
(နိုင်ငံတကာ ခေတ်သစ် ဂန္ထဝင် ဝတ္ထုတိုများ(၄) စာအုပ်မှ ကူးယူဖော်ပြပါသည်။)
source;http://www.khayaynge.com/?p=969
No comments:
Post a Comment